印度咖喱牛扒配墨西哥薄餅

最近Jamie's係香港開餐廳，我並沒有意慾去食，原因係因為我由細到大見佢煮野都係亂黎，好睇唔好食。但係我又唔會唔睇佢教煮野食，因為可以得到更多靈感。早2日見到佢教整印度咖喱牛扒又真係好似幾好食，所以決定今晚就跟佢試一試。結果係。。。。。真係幾好食的。大家可以參考參考。

材料：

西冷扒－－－－－－ ＞2塊
Jalfrezi咖喱－－－－＞1/2樽
露筍－－－－－－－ ＞1包
椰漿－－－－－－－ ＞80ML
墨西哥薄餅－－－－ ＞4塊
海鹽－－－－－－－ ＞1/2茶匙
橄欖油－－－－－－ ＞1湯匙
黑椒－－－－－－－ ＞1/2茶匙
檸檬汁－－－－－－ ＞隨意


首先係要用2湯匙Jalfrezi咖喱漿，黑椒，檸檬汁醃牛扒（但係我覺得冇需要醃）因為醃完都唔覺待別好味。

係醃緊的時候就準備定個咖喱汁，用80ML椰漿加大半支咖喱煮滾就可以

之後就可以烤露筍，方法好簡單，用中火，唔需要落油，直接放露筍乾煎，唔需要理佢，直至你覺得會燶就反一反佢，因為要做到好似燒烤的感覺

當兩面都有燶及縮水就可以放入橄欖油，檸檬汁，海鹽，黑椒略炒就完成啦

之後就要放墨西哥薄餅入焗爐大約160度焗4-5分鐘，如果怕燶可以用錫紙包住

依家就正式整牛扒，用中大火煎

每邊煎大約45秒就可以反一反佢，至於要幾成熟就要自己慢慢掌握啦

上碟斜切，你會見到2隻色就最正啦

最後把薄餅用手撕開就完成啦

今餐用左15分鐘就煮好，真係又快又好食

Risotto with Fresh Clams and Scallop in Artichoke Garlic Sauce

Artichoke，又叫呀支竹，好健康架。記得有一次去街食飯，旁邊的食客係咁講英文，仲要講得超大聲『丫支續』『丫支續』，果一刻真係由個心笑出黎。自此，『丫支續』就變成我的不正常發音了。

講返正題先，好多人都會話Risotto好易煮，其實易煮同煮得好食，係兩回事，所以今日就分享下煮意大利飯的心得。

材料：

洋蔥碎－－－－－－＞1/2個

蒜蓉－－－－－－－＞3粒

Risotto－－－－－－＞1飯碗

花甲－－－－－－－＞1/2斤

帶子－－－－－－－＞2粒

橄欖油－－－－－－＞4湯匙

牛油－－－－－－－＞隨意

罐裝Artichoke－－-＞3粒

Ajinomoto－－－－＞2粒

水－－－－－－－－＞1200ml

海鹽－－－－－－－＞1/2茶匙

黑椒－－－－－－－＞1/2茶匙

一開始又係要用鹽水浸花甲，準備切洋蔥粒，蒜蓉，Artichoke

帶子依隻都幾好食，又唔會太貴，煮之前拎出黎沖沖水同埋浸下佢，落鑊前記得用紙巾吸乾水份（最少要用2張紙巾），吸乾水份後在帶子上放少少鹽同黑椒，用大火少油每邊煎20-25秒）

Ajinomoto就好似雞湯的用法，2粒可以開1200ml 水都夠味(記得用熱水），用黎一陣煮Risotto，如果冇就可以用清雞湯代替

當準備好一切，就可以落橄欖油用中火炒香洋蔥及蒜蓉，炒大約1分鐘就可以放花甲落去略炒，炒至變色就夾起備用

之後原鑊炒埋Risotto, 記得米係唔需要洗的。

用大火炒到每粒米都有油份的時候，就可以落大約2湯殼湯落去

記得要KEEP住炒，每當水份收乾後就落湯，大約每次一湯殼就可以

當煮大約8分鐘左右，就可以放入Artichoke碎

 煮大約15分鐘後，轉中細火，把花甲放入，牛油放面焗2分鐘便可以了

最後上碟前放入海鹽及黑椒，上碟後把帶子放面就完成啦

蒜蓉粉絲蒸花竹蝦

見到街市d花竹蝦好新鮮，又唔係好貴，所以就決定用蒜蓉粉絲蒸啦。簡單又好味！

材料：

花竹蝦－－－－－＞半斤

蒜蓉－－－－－－＞5湯匙

牛油－－－－－－＞1湯匙

食用油－－－－－＞2湯匙

粉絲－－－－－－＞1包

雞粉－－－－－－＞1茶匙

海鹽－－－－－－＞1/2茶匙

蔥－－－－－－－＞1棵

豉油－－－－－－＞隨意

首先當然要準備好蒜蓉

之後開細火落食用油，牛油，蒜蓉，海鹽

Keep 住用細火煮，直到起泡泡就可熄火備用

之後就要將蝦的觸鬚，眼精以上的位置連埋個刺，蝦尾的尖刺都要剪走，如果唔係好易''吉''親咀，另外剪完要後要沖洗乾淨個蝦頭同埋蝦腸。（沖洗後要即刻落鑊蒸，否則肉會變''梅''的）

粉絲就要預先用凍水浸軟，待軟身後隔水，放係碟上加入雞粉調味（如果唔係蒸出黎的粉絲會冇味），之後放埋d蝦上面再加埋蒜蓉就ok 啦

當一切準備好就等水滾後放落去蒸5-6分鐘就食得。（最後放入蔥花，熟油，豉油）

釀雞全翼

出街食釀雞翼，永遠得半隻，又唔好食，不如自己整，其實拆隻雞翼唔係好難，只需大約1分鐘就可以拆到1隻，至於搵咩黎釀就建議用豬肉，冬菇，瑤柱等等。不過最近話豬肉有蟲，所以改用牛肉，但係做出黎效果比豬肉差。但係都好好食。快d搵日冇野做就拆下雞翼啦。

材料：

牛肉碎－－－－－－＞2盒大約400G
雞全翼－－－－－－＞6隻
法式芥未醬－－－－＞1湯匙
檸檬汁－－－－－－＞1/2個
雞蛋黃－－－－－－＞1隻
Basil碎－－－－－－＞1－2棵
芝麻－－－－－－－＞隨意
橄欖油－－－－－－＞2茶匙
花生醬－－－－－－＞1湯匙
雞粉－－－－－－－＞1茶匙
黑椒－－－－－－－＞1茶匙

首先係準備好釀入雞翼的肉，把全部材料混在一起，醃大約30分鐘。（牛肉一遇到鹽就會硬到食唔到，所以用雞粉代替）

之後係拆雞翼前要先把雞翼的關節位大力扭斷，再準備一把夠利的刀仔就好易拆架啦。一開始係雞槌頂圍住個圈用刀𠝹一下，令到雞肉同骨分開，就可以好易扯低雞肉，可以一邊起肉一邊用刀仔幫手切斷d根。好快就會下圖咁架啦

之後你會Feel到少少成功感，去到雞翼位，如果你一開始夠大力咁扭斷雞翼關節位，就會好似下圖咁。當扯左雞槌骨出黎後，就可以順便扯2條雞骨出黎，如果唔係就要用刀係個接口位𠝹一𠝹，目的要切走個軟骨，但係小心𠝹穿。

成功後，雞翼表面要完整，如果穿左隆就唔合格啦。

好快就拆完。其實真係唔難，我記得第一次學拆雞翼時我只有17歲。

當拆好後，你會覺得好攰。係正常的，如有需要可以休息下，如冇需要就可以把牛肉釀入雞翼中。再放入預熱左的焗爐用200度焗20分鐘。當發現雞翼表面金黃色時，就可以反一反。（如果冇焗爐，可以煎，味道差唔多的）

本來芝麻係放入牛肉的，因為唔記得，所以放係面啦。