白酒香蒜Semisecco炒蜆

Semisecco的味道好濃，比車厘茄香，最岩用黎煮意粉同炒蜆。再加埋新鮮的百搭Parsley, 簡直絕配！

材料：

Semisecco－－－>1湯匙
白酒－－－－－－->2湯匙
蜆－－－－－－－->1斤
蒜頭－－－－－－->3粒
Parsley－－－－－>8棵
海鹽－－－－－－->半茶匙
玉桂粉－－－－－->半茶匙
橄欖油－－－－－->2湯匙


首先係要浸蜆吐沙，記得落鹽，鹽落2湯匙就夠啦，至於時間就有幾耐就幾耐啦，吐沙其間可以準備切蒜蓉同埋把Parsley每棵一開三備用

先落橄欖油用中火炒蒜蓉，之後放入5棵Parsley，炒至軟身

便可以放入蜆及轉為大火炒大約一分鐘

之後放入白酒，Semisecco及月桂粉略炒及焗一分鐘，直至蜆開口為至 （其實煮茄汁類的餸要煮得好食，秘缺就係月桂粉，唔信可以試試）

最後落鹽調味及把餘下的Parsley放入，完成！

清湯日本蘿蔔牛肋條

好耐冇煮飯啦，難得今日有時間，就煮個蘿白牛肋條，清甜好味，好適合夏天的一個餸

材料：

日本白蘿蔔－－－半條
美國牛肋條－－－3條
香葉－－－－－－3塊
八角－－－－－－2粒
花椒－－－－－－10粒
薑－－－－－－－2大片
海鹽－－－－－－少許（需視乎水的份量）
Parsely－－－－－3棵 （可用蔥代替）


首先要把白蘿蔔去皮及切角待用，牛肋條要飛一飛水，時間大約為水滾後放開始計30秒就可以。之後要沖凍水，直至牛肉變凍就可以。（記得牛肋條唔需要切，整條放入去飛水）

之後準備一煲新的熱水，待水滾後，放入花椒，八角，香葉，薑及整條牛肋條，用中火煮大約45分鐘

45分鐘後把預先切好的蘿蔔放入煲中，再煮30分鐘，直至蘿蔔軟身便可以

在熄火前把牛肋條剪成粒狀及調味，熄火後可放入Parsely就完成。

這個簡單又好味的蘿蔔牛肋條用黎招呼朋友簡直一流

韮菜炒蝦球

其實我中意食中餐多過西餐，所以我煮中餐都會比西餐好。話晒都學過幾年廚，所以先夠膽咁講！言歸正傳，快D試下啦！！！

材料：

老虎蝦－－－半斤

韮菜－－－－1磅

蒜蓉－－－－2粒

薑蓉－－－－2片

生粉水－－－少許

海鹽－－－－少許

蝦湯－－－－3湯匙

首先要幫蝦脫殼，殻留返黎做個蝦湯，係蝦背用刀開一刀，清理腸臟，待清理好後，用鹽醃20分鐘

係醃蝦的時候，可以煮個蝦湯，首先用大火把蝦殻炒香（記得落少少油）

炒至金黃色後就加少量熱水滾10分鐘，最後把湯倒入碗中便完成

20分鐘過後，要把醃過的蝦沖水及把多餘的水倒走 （唔需要用蛋白醃都可以好好食，快D試下）

記得用大火先炒蝦球，炒至7成熟就可盛起

之後原鑊加油，蒜蓉，薑蓉炒香及放入韮菜 （韮菜記得切走頭尾， 同埋用大火炒）

炒大約30秒後放入蝦球，蝦湯及海鹽

最後放入生粉水便完成，如需要的可加少少生油或者麻油（簡稱鑊尾油）。咁樣成碟好有光澤架啦！

香蒜車厘茄蜆肉意粉

今晚就煮個簡簡單單的車厘茄意粉，簡單，好味

材料：
車厘茄半磅
蜆半斤
意粉適量
橄欖油少許
海鹽少許
白酒2湯匙
黑椒少許
蒜頭2粒



首先最重要就係要令到D蜆吐沙，係水中放入3至4湯匙鹽，時間就有越長越好。煮前要過1-2次水。另外車厘茄都要洗一洗

蒜頭切片會好D

白酒用最平果隻就OK，各大超市有售

煮意粉記得係水中落油及鹽，如果唔係會癡底。大約煮8-10分鐘就可以，煮好後要沖水備用

待油熱後放入蒜片及車厘茄中慢火炒，可以壓碎車厘茄，令到茄汁溶入油中

再把蜆肉放下，記得依個時候要轉大火炒

再放入白酒及鹽，蓋上蓋，大約1分鐘，再放入意粉，炒一炒再上蓋焗1分鐘

完成後放上少許黑椒就OK！快D試下啦！

韓式人參雞湯

相信好多人去韓國旅行時都會食''人參雞湯''，但係其實人人都可以自己煲到的，大家可以試試

材料：

春雞1隻

韓國人參1盒

薑少許

蒜頭3粒

蔥1條

糯米1/2杯

紅棗少許

杞子少許

海鹽少許

煲人參雞湯要預先浸定糯米（時間大約2小時之上），紅棗及杞子

人參要清洗及切成細塊

春雞要用熱水出一出水（出水時，在熱水中放入薑及紹慶酒），出水後記得要沖凍水，令隻雞變凍，之後就可以把糯米，人參，蒜頭，紅棗，杞子塞入雞中及用牙簽封住個尾

準備好就可以放入熱水慢慢煲啦，放雞後要用大火令熱水滾起，之後轉用中細火黛大約一小時就得啦

最後把蔥花及海鹽落入湯中，就完成了

你可以選擇把原隻雞取出慢慢食，又或者放回湯中浸住食都可以。隨自己喜歡

最後記得配埋個用海鹽，胡椒粉及黑椒粉做成的特色鹽用來點雞呀！