Risotto with Fresh Clams and Scallop in Artichoke Garlic Sauce

Artichoke，又叫呀支竹，好健康架。記得有一次去街食飯，旁邊的食客係咁講英文，仲要講得超大聲『丫支續』『丫支續』，果一刻真係由個心笑出黎。自此，『丫支續』就變成我的不正常發音了。

講返正題先，好多人都會話Risotto好易煮，其實易煮同煮得好食，係兩回事，所以今日就分享下煮意大利飯的心得。

材料：

洋蔥碎－－－－－－＞1/2個

蒜蓉－－－－－－－＞3粒

Risotto－－－－－－＞1飯碗

花甲－－－－－－－＞1/2斤

帶子－－－－－－－＞2粒

橄欖油－－－－－－＞4湯匙

牛油－－－－－－－＞隨意

罐裝Artichoke－－-＞3粒

Ajinomoto－－－－＞2粒

水－－－－－－－－＞1200ml

海鹽－－－－－－－＞1/2茶匙

黑椒－－－－－－－＞1/2茶匙

一開始又係要用鹽水浸花甲，準備切洋蔥粒，蒜蓉，Artichoke

帶子依隻都幾好食，又唔會太貴，煮之前拎出黎沖沖水同埋浸下佢，落鑊前記得用紙巾吸乾水份（最少要用2張紙巾），吸乾水份後在帶子上放少少鹽同黑椒，用大火少油每邊煎20-25秒）

Ajinomoto就好似雞湯的用法，2粒可以開1200ml 水都夠味(記得用熱水），用黎一陣煮Risotto，如果冇就可以用清雞湯代替

當準備好一切，就可以落橄欖油用中火炒香洋蔥及蒜蓉，炒大約1分鐘就可以放花甲落去略炒，炒至變色就夾起備用

之後原鑊炒埋Risotto, 記得米係唔需要洗的。

用大火炒到每粒米都有油份的時候，就可以落大約2湯殼湯落去

記得要KEEP住炒，每當水份收乾後就落湯，大約每次一湯殼就可以

當煮大約8分鐘左右，就可以放入Artichoke碎

 煮大約15分鐘後，轉中細火，把花甲放入，牛油放面焗2分鐘便可以了

最後上碟前放入海鹽及黑椒，上碟後把帶子放面就完成啦

蒜蓉粉絲蒸花竹蝦

見到街市d花竹蝦好新鮮，又唔係好貴，所以就決定用蒜蓉粉絲蒸啦。簡單又好味！

材料：

花竹蝦－－－－－＞半斤

蒜蓉－－－－－－＞5湯匙

牛油－－－－－－＞1湯匙

食用油－－－－－＞2湯匙

粉絲－－－－－－＞1包

雞粉－－－－－－＞1茶匙

海鹽－－－－－－＞1/2茶匙

蔥－－－－－－－＞1棵

豉油－－－－－－＞隨意

首先當然要準備好蒜蓉

之後開細火落食用油，牛油，蒜蓉，海鹽

Keep 住用細火煮，直到起泡泡就可熄火備用

之後就要將蝦的觸鬚，眼精以上的位置連埋個刺，蝦尾的尖刺都要剪走，如果唔係好易''吉''親咀，另外剪完要後要沖洗乾淨個蝦頭同埋蝦腸。（沖洗後要即刻落鑊蒸，否則肉會變''梅''的）

粉絲就要預先用凍水浸軟，待軟身後隔水，放係碟上加入雞粉調味（如果唔係蒸出黎的粉絲會冇味），之後放埋d蝦上面再加埋蒜蓉就ok 啦

當一切準備好就等水滾後放落去蒸5-6分鐘就食得。（最後放入蔥花，熟油，豉油）

釀雞全翼

出街食釀雞翼，永遠得半隻，又唔好食，不如自己整，其實拆隻雞翼唔係好難，只需大約1分鐘就可以拆到1隻，至於搵咩黎釀就建議用豬肉，冬菇，瑤柱等等。不過最近話豬肉有蟲，所以改用牛肉，但係做出黎效果比豬肉差。但係都好好食。快d搵日冇野做就拆下雞翼啦。

材料：

牛肉碎－－－－－－＞2盒大約400G
雞全翼－－－－－－＞6隻
法式芥未醬－－－－＞1湯匙
檸檬汁－－－－－－＞1/2個
雞蛋黃－－－－－－＞1隻
Basil碎－－－－－－＞1－2棵
芝麻－－－－－－－＞隨意
橄欖油－－－－－－＞2茶匙
花生醬－－－－－－＞1湯匙
雞粉－－－－－－－＞1茶匙
黑椒－－－－－－－＞1茶匙

首先係準備好釀入雞翼的肉，把全部材料混在一起，醃大約30分鐘。（牛肉一遇到鹽就會硬到食唔到，所以用雞粉代替）

之後係拆雞翼前要先把雞翼的關節位大力扭斷，再準備一把夠利的刀仔就好易拆架啦。一開始係雞槌頂圍住個圈用刀𠝹一下，令到雞肉同骨分開，就可以好易扯低雞肉，可以一邊起肉一邊用刀仔幫手切斷d根。好快就會下圖咁架啦

之後你會Feel到少少成功感，去到雞翼位，如果你一開始夠大力咁扭斷雞翼關節位，就會好似下圖咁。當扯左雞槌骨出黎後，就可以順便扯2條雞骨出黎，如果唔係就要用刀係個接口位𠝹一𠝹，目的要切走個軟骨，但係小心𠝹穿。

成功後，雞翼表面要完整，如果穿左隆就唔合格啦。

好快就拆完。其實真係唔難，我記得第一次學拆雞翼時我只有17歲。

當拆好後，你會覺得好攰。係正常的，如有需要可以休息下，如冇需要就可以把牛肉釀入雞翼中。再放入預熱左的焗爐用200度焗20分鐘。當發現雞翼表面金黃色時，就可以反一反。（如果冇焗爐，可以煎，味道差唔多的）

本來芝麻係放入牛肉的，因為唔記得，所以放係面啦。

孜然骨

孜然骨基本上係唔需要任何技巧都已經可以煮到好好食，唯一需要就係時間。如果有時間可以一試，因為真係好食到停唔到口。

材料：

一字排－－－－＞8條
乾辣椒－－－－＞隨意
蔥－－－－－－＞1條
孜然粉－－－－＞隨意
紹慶酒－－－－＞半茶匙
海鹽－－－－－＞半茶匙

簡易滷水汁
水－－－－－－＞2飯碗
生抽－－－－－＞2茶匙
老抽－－－－－＞2湯匙
雞粉－－－－－＞1茶匙
冰糖－－－－－＞2茶匙
花椒－－－－－＞少許
香葉－－－－－＞2片
八角－－－－－＞2粒


首先排骨要用熱水煮一煮，再沖凍水，直至肉身變凍，之後可以準備定滷水汁。當滷水汁煮滾後，可放入排骨用中慢火煮大約30分鐘再焗30分鐘，之後再煮30分鐘再焗直至食用為至，當然時間越長越好。

當要食用前，記得用中大火把排骨煎至乾身。（排骨要抺乾先好煎）

當煎好後就可以夾起備用，再準備一隻新鑊，落少少油，等油夠熱就可放入辣椒乾及孜然粉略炒（要用細火炒），再放入紹慶酒

之後把排骨放入轉大火略炒再落少少海鹽同埋蔥花，完成！

啫啫通菜煲

啫啫通菜平時出街都成日食，不過出街食味精多，自己煮就健康得多，味道又差唔多。

材料：

蝦乾／蝦米－－－＞隨意

蒜－－－－－－－＞2粒

子天椒－－－－－＞1條

通菜－－－－－－＞1斤

蝦膏－－－－－－＞隨意

薑－－－－－－－＞1片

海鹽－－－－－－＞半茶匙

首先蝦米要浸一浸水，係水中加片薑，同埋準備蝦膏（記得係蝦膏中加少少熱水，令蝦膏溶化）

之後準備落鑊，要大火炒，一開始油溫唔高的時候就要落蒜粒及蝦乾略炒 （如有蔥頭，可以落埋，會更加香）

當炒到嗅到香味就可以落通菜，炒至通菜縮水後，可以落蝦膏及子天椒。（亮得依個菜，唔好落任何水去炒）

同一時間可以用火去燒熱個煲。唔需要落油架

最後放炒好的通菜入預熱好的煲就攪掂啦。 食到最後一條菜都仲係好熱架！

口水雞

見今日有時間，就整個口水雞俾大家試試。

材料：

雞－－－－＞1隻

花生－－－＞隨意

紅油材料：

食用油－－＞5湯匙

芝麻－－－＞1湯匙（記得要用慢火炒，唔需要落油炒）

麻油－－－＞1茶匙

花椒－－－＞2茶匙

八角－－－＞2粒

薑－－－－＞3片

蔥－－－－＞1棵

蒜頭－－－＞2粒

口水醬材料：

辣椒乾－－＞15條切細粒

辣椒粉－－＞2湯匙

辣椒醬－－＞1湯匙

芝麻－－－＞1湯匙

雞粉－－－＞1湯匙

生抽－－－＞1茶匙

糖－－－－＞半茶匙

首先雞洗乾淨，頭同頸部切走，之後準備一煲熱水，在熱水中放入，蔥，薑，紹慶酒，待水滾後打雞放入，再滾大約1分鐘後關火焗45-50分鐘

係等緊隻雞熟的同時，就準備定醬汁。首先就係把口水醬材料放在碗中，但係生抽係落左油先落。

紅油就係要係食油中放入紅油材料慢煮大約5分鐘，記得用慢火。

把有香味的食油，倒入口水醬中，記得用個隔網隔住d材料。之後略為攪拌備用。

之後再準備埋花生，用慢火乾炒。備用

當45分鐘過後，雞要拎出來浸冰水，待成隻雞凍晒就可以切及準備上碟。

當上碟後就可以把已調好味的紅油醬及花生倒入，再放上蔥或芫茜便完成。